Liber VI SHOW LINKS TO MANUSCRIPTS
1 | Postquam castra duces pugnae iam mente propinquis |
2 | inposuere iugis admotaque comminus arma |
3 | parque suum videre dei, capere omnia Caesar |
4 | moenia Graiorum spernit Martemque secundum |
5 | iam nisi de genero fatis debere recusat. |
6 | funestam mundo votis petit omnibus horam |
7 | in casum quae cuncta ferat; placet alea fati |
8 | alterutrum mersura caput. ter collibus omnis |
9 | explicuit turmas et signa minantia pugnam |
10 | testatus numquam Latiae se desse ruinae. |
11 | ut videt ad nullos exciri posse tumultus |
12 | in pugnam generum sed clauso fidere vallo, |
13 | signa movet tectusque via dumosa per arva |
14 | Dyrrachii praeceps rapiendas tendit ad arcis. |
15 | hoc iter aequoreo praecepit limite Magnus, |
16 | quemque vocat collem Taulantius incola Petram |
17 | insedit castris Ephyraeaque moenia servat |
18 | defendens tutam vel solis turribus urbem. |
19 | non opus hanc veterum nec moles structa tuetur |
20 | humanusque labor facilis, licet ardua tollat, |
21 | cedere vel bellis vel cuncta moventibus annis, |
22 | sed munimen habet nullo quassabile ferro |
23 | naturam sedemque loci; nam clausa profundo |
24 | undique praecipiti scopulisque vomentibus aequor |
25 | exiguo debet, quod non est insula, colli. |
26 | terribiles ratibus sustentant moenia cautes, |
27 | Ioniumque furens, rapido cum tollitur Austro, |
28 | templa domosque quatit, spumatque in culmina pontus. |
29 | hic avidam belli rapuit spes inproba mentem |
30 | Caesaris, ut vastis diffusum collibus hostem |
31 | cingeret ignarum ducto procul aggere valli. |
32 | metatur terras oculis, nec caespite tantum |
33 | contentus fragili subitos attollere muros |
34 | ingentis cautes avolsaque saxa metallis |
35 | Graiorumque domos direptaque moenia transfert. |
36 | extruitur quod non aries inpellere saevus, |
37 | quod non ulla queat violenti machina belli. |
38 | franguntur montes, planumque per ardua Caesar |
39 | ducit opus; pandit fossas turritaque summis |
40 | disponit castella iugis magnoque recessu |
41 | amplexus fines saltus nemorosaque tesqua |
42 | et silvas vastaque feras indagine claudit. |
43 | non desunt campi, non desunt pabula Magno, |
44 | castraque Caesareo circumdatus aggere mutat: |
45 | flumina tot cursus illic exorta fatigant, |
46 | illic mersa suos; operumque ut summa revisat |
47 | defessus Caesar mediis intermanet agris. |
48 | nunc vetus Iliacos attollat fabula muros |
49 | ascribatque deis; fragili circumdata testa |
50 | moenia mirentur refugi Babylonia Parthi. |
51 | en, quantum Tigris, quantum celer ambit Orontes, |
52 | Assyriis quantum populis telluris Eoae |
53 | sufficit in regnum, subitum bellique tumultu |
54 | raptum clausit opus. tanti periere labores. |
55 | tot potuere manus aut iungere Seston Abydo |
56 | ingestoque solo Phrixeum elidere pontum, |
57 | aut Pelopis latis Ephyren abrumpere regnis |
58 | et ratibus longae flexus donare Maleae, |
59 | aut aliquem mundi, quamvis natura negasset, |
60 | in melius mutare locum. coit area belli: |
61 | hic alitur sanguis terras fluxurus in omnis, |
62 | hic et Thessalicae clades Libycaeque tenentur; |
63 | aestuat angusta rabies civilis harena. |
64 | prima quidem surgens operum structura fefellit |
65 | Pompeium, veluti mediae qui tutus in arvis |
66 | Sicaniae rabidum nescit latrare Pelorum, |
67 | aut, vaga cum Tethys Rutupinaque litora fervent, |
68 | unda Caledonios fallit turbata Britannos. |
69 | ut primum vasto saeptas videt aggere terras, |
70 | ipse quoque a tuta deducens agmina Petra |
71 | diversis spargit tumulis, ut Caesaris arma |
72 | laxet et effuso claudentem milite tendat; |
73 | ac tantum saepti vallo sibi vindicat agri, |
74 | parva Mycenaeae quantum sacrata Dianae |
75 | distat ab excelsa nemoralis Aricia Roma, |
76 | quoque modo terrae praelapsus moenia Thybris |
77 | in mare descendit, si nusquam torqueat amnem. |
78 | classica nulla sonant iniussaque tela vagantur |
79 | et fit saepe nefas iaculum temptante lacerto. |
80 | maior cura duces miscendis abstrahit armis: |
81 | Pompeium exhaustae praebenda ad gramina terrae, |
82 | quae currens obtrivit eques gradibusque citatis |
83 | ungula frondentem discussit cornea campum. |
84 | belliger attonsis sonipes defessus in arvis, |
85 | advectos cum plena ferant praesepia culmos, |
86 | ore novas poscens moribundus labitur herbas |
87 | et tremulo medios abrumpit poplite gyros. |
88 | corpora dum solvit tabes et digerit artus, |
89 | traxit iners caelum fluvidae contagia pestis |
90 | obscuram in nubem. tali spiramine Nesis |
91 | emittit Stygium nebulosis aera saxis |
92 | antraque letiferi rabiem Typhonis anhelant. |
93 | inde labant populi, caeloque paratior unda |
94 | omne pati virus duravit viscera caeno. |
95 | iam riget arta cutis distentaque lumina rumpit, |
96 | igneaque in vultus et sacro fervida morbo |
97 | pestis abit, fessumque caput se ferre recusat. |
98 | iam magis atque magis praeceps agit omnia fatum, |
99 | nec medii dirimunt morbi vitamque necemque, |
100 | sed languor cum morte venit; turbaque cadentum |
101 | aucta lues, dum mixta iacent incondita vivis |
102 | corpora; nam miseros ultra tentoria cives |
103 | spargere funus erat. tamen hos minuere labores |
104 | a tergo pelagus pulsusque Aquilonibus aer |
105 | litoraque et plenae peregrina messe carinae. |
106 | at liber terrae spatiosis collibus hostis |
107 | aere non pigro nec inertibus angitur undis, |
108 | sed patitur saevam, veluti circumdatus arta |
109 | opsidione, famem. nondum turgentibus altam |
110 | in segetem culmis cernit miserabile vulgus |
111 | in pecudum cecidisse cibos et carpere dumos |
112 | et foliis spoliare nemus letumque minantis |
113 | vellere ab ignotis dubias radicibus herbas. |
114 | quae mollire queunt flamma, quae frangere morsu, |
115 | quaeque per abrasas utero demittere fauces, |
116 | plurimaque humanis ante hoc incognita mensis |
117 | diripiens miles saturum tamen obsidet hostem. |
118 | ut primum libuit ruptis euadere claustris |
119 | Pompeio cunctasque sibi permittere terras, |
120 | non obscura petit latebrosae tempora noctis, |
121 | et raptum furto soceri cessantibus armis |
122 | dedignatur iter: latis exire ruinis |
123 | quaerit, et inpulso turres confringere vallo, |
124 | perque omnis gladios et qua via caede paranda est. |
125 | opportuna tamen valli pars visa propinqui, |
126 | qua Minici castella vacant, et confraga densis |
127 | arboribus dumeta tegunt. hic pulvere nullo |
128 | proditus agmen agit subitusque in moenia venit. |
129 | tot simul e campis Latiae fulsere volucres, |
130 | tot cecinere tubae. nequid victoria ferro |
131 | deberet, pavor attonitos confecerat hostes. |
132 | quod solum valuit virtus, iacuere perempti |
133 | debuerant quo stare loco. qui vulnera ferrent |
134 | iam derant, et nimbus agens tot tela peribat. |
135 | tum piceos volvunt inmissae lampades ignes, |
136 | tum quassae nutant turres lapsumque minantur, |
137 | roboris inpacti crebros gemit agger ad ictus. |
138 | iam Pompeianae celsi super ardua valli |
139 | exierant aquilae, iam mundi iura patebant: |
140 | quem non mille simul turmis nec Caesare toto |
141 | auferret Fortuna locum victoribus unus |
142 | eripuit vetuitque capi, seque arma tenente |
143 | ac nondum strato Magnum vicisse negavit. |
144 | Scaeva viro nomen: castrorum in plebe merebat |
145 | ante feras Rhodani gentes; ibi sanguine multo |
146 | promotus Latiam longo gerit ordine vitem, |
147 | pronus ad omne nefas et qui nesciret in armis |
148 | quam magnum virtus crimen civilibus esset. |
149 | hic ubi quaerentis socios iam Marte relicto |
150 | tuta fugae cernit, 'quo vos pavor' inquit 'adegit |
151 | inpius et cunctis ignotus Caesaris armis? |
152 | ? |
153 | terga datis morti? cumulo vos desse virorum |
154 | non pudet et bustis interque cadavera quaeri? |
155 | non ira saltem, iuvenes, pietate remota |
156 | stabitis? e cunctis, per quos erumperet hostis, |
157 | nos sumus electi. non parvo sanguine Magni |
158 | iste dies ierit. peterem felicior umbras |
159 | Caesaris in vultu: testem hunc fortuna negavit: |
160 | Pompeio laudante cadam. confringite tela |
161 | pectoris inpulsu iugulisque retundite ferrum. |
162 | iam longinqua petit pulvis sonitusque ruinae, |
163 | securasque fragor concussit Caesaris aures. |
164 | vincimus, o socii: veniet qui vindicet arces |
165 | dum morimur. ' movit tantum vox illa furorem, |
166 | quantum non primo succendunt classica cantu, |
167 | mirantesque virum atque avidi spectare secuntur |
168 | scituri iuvenes, numero deprensa locoque |
169 | an plus quam mortem virtus daret. ille ruenti |
170 | aggere consistit, primumque cadavera plenis |
171 | turribus evolvit subeuntisque obruit hostis |
172 | corporibus, totaeque viro dant tela ruinae, |
173 | roboraque et moles hosti seque ipse minatur. |
174 | nunc sude nunc duro contraria pectora conto |
175 | detrudit muris, et valli summa tenentis |
176 | amputat ense manus; caput obterit ossaque saxo |
177 | ac male defensum fragili conpage cerebrum |
178 | dissipat; alterius flamma crinesque genasque |
179 | succendit, strident oculis ardentibus ignes. |
180 | ut primum cumulo crescente cadavera murum |
181 | admovere solo, non segnior extulit illum |
182 | saltus et in medias iecit super arma catervas, |
183 | quam per summa rapit celerem venabula pardum. |
184 | tunc densos inter cuneos conpressus et omni |
185 | vallatus bello vincit, quem respicit, hostem. |
186 | iamque hebes et crasso non asper sanguine mucro |
187 | (percussum Scaevae frangit, non vulnerat, hostem;) |
188 | perdidit ensis opus, frangit sine vulnere membra. |
189 | illum tota premit moles, illum omnia tela, |
190 | nulla fuit non certa manus, non lancea felix; |
191 | parque novum Fortuna videt concurrere, bellum |
192 | atque virum. fortis crebris sonat ictibus umbo, |
193 | et galeae fragmenta cavae conpressa perurunt |
194 | tempora, nec quicquam nudis vitalibus obstat |
195 | iam praeter stantis in summis ossibus hastas. |
196 | quid nunc, vaesani, iaculis levibusve sagittis |
197 | perditis haesuros numquam vitalibus ictus? |
198 | hunc aut tortilibus vibrata falarica nervis |
199 | obruat aut vasti muralia pondera saxi, |
200 | hunc aries ferro ballistaque limine portae |
201 | promoveat. stat non fragilis pro Caesare murus |
202 | Pompeiumque tenet. iam pectora non tegit armis, |
203 | ac veritus credi clipeo laevaque vacasse |
204 | aut culpa vixisse sua tot vulnera belli |
205 | solus obit densamque ferens in pectore silvam |
206 | iam gradibus fessis, in quem cadat, eligit hostem. |
207 | (par pelagi monstris Libycae sic belua terrae) |
208 | sic Libycus densis elephans oppressus ab armis |
209 | omne repercussum squalenti missile tergo |
210 | frangit et haerentis mota cute discutit hastas: |
211 | viscera tuta latent penitus, citraque cruorem |
212 | confixae stant tela ferae: tot facta sagittis, |
213 | tot iaculis unam non explent vulnera mortem. |
214 | Dictaea procul, ecce, manu Gortynis harundo |
215 | tenditur in Scaevam, quae voto certior omni |
216 | in caput atque oculi laevom descendit in orbem. |
217 | ille moras ferri nervorum et vincula rumpit |
218 | adfixam vellens oculo pendente sagittam |
219 | intrepidus, telumque suo cum lumine calcat. |
220 | Pannonis haud aliter post ictum saevior ursa, |
221 | cum iaculum parva Libys ammentavit habena, |
222 | se rotat in vulnus telumque irata receptum |
223 | inpetit et secum fugientem circumit hastam. |
224 | perdiderat vultum rabies, stetit imbre cruento |
225 | informis facies. laetus fragor aethera pulsat |
226 | victorum: maiora viris e sanguine parvo |
227 | gaudia non faceret conspectum in Caesare vulnus. |
228 | ille tegens alta suppressum mente furorem, |
229 | mitis et a vultu penitus virtute remota, |
230 | 'parcite', ait 'cives; procul hinc avertite ferrum. |
231 | conlatura meae nil sunt iam vulnera morti: |
232 | non eget ingestis sed volsis pectore telis. |
233 | tollite et in Magni viventem ponite castris. |
234 | hoc vestro praestate duci: sit Scaeva relicti |
235 | Caesaris exemplum potius quam mortis honestae. ' |
236 | credidit infelix simulatis vocibus Aulus |
237 | nec vidit recto gladium mucrone tenentem, |
238 | membraque captivi pariter laturus et arma |
239 | fulmineum mediis excepit faucibus ensem. |
240 | incaluit virtus, atque una caede refectus |
241 | 'solvat' ait 'poenas, Scaevam quicumque subactum |
242 | speravit. pacem gladio si quaerit ab isto |
243 | Magnus, adorato summittat Caesare signa. |
244 | an similem vestri segnemque ad fata putatis? |
245 | Pompei vobis minor est causaeque senatus |
246 | quam mihi mortis amor. ' simul haec effatur, et altus |
247 | Caesareas pulvis testatur adesse cohortes. |
248 | dedecus hic belli Magno crimenque remisit, |
249 | ne solum totae fugerent, te Scaeva, catervae. |
250 | subducto qui Marte ruis; nam sanguine fuso |
251 | vires pugna dabat. labentem turba suorum |
252 | excipit atque umeris defectum inponere gaudet; |
253 | ac velut inclusum perfosso in pectore numen |
254 | et vivam magnae speciem Virtutis adorant; |
255 | telaque confixis certant evellere membris, |
256 | exornantque deos ac nudum pectore Martem |
257 | armis, Scaeva, tuis: felix hoc nomine famae, |
258 | si tibi durus Hiber aut si tibi terga dedisset |
259 | Cantaber exiguis aut longis Teutonus armis. |
260 | non tu bellorum spoliis ornare Tonantis |
261 | templa potes, non tu laetis ululare triumphis. |
262 | infelix, quanta dominum virtute parasti! |
263 | nec magis hac Magnus castrorum parte repulsus |
264 | intra claustra piger dilato Marte quievit, |
265 | quam mare lassatur, cum se tollentibus Euris |
266 | frangentem fluctus scopulum ferit aut latus alti |
267 | montis adest seramque sibi parat unda ruinam. |
268 | hinc vicina petens placido castella profundo |
269 | incursu gemini Martis rapit, armaque late |
270 | spargit et effuso laxat tentoria campo, |
271 | mutandaeque iuvat permissa licentia terrae. |
272 | sic pleno Padus ore tumens super aggere tutas |
273 | excurrit ripas et totos concutit agros; |
274 | succubuit siqua tellus cumuloque furentem |
275 | undarum non passa ruit, tum flumine toto |
276 | transit et ignotos operit sibi gurgite campos: |
277 | illos terra fugit dominos, his rura colonis |
278 | accedunt donante Pado. vix proelia Caesar |
279 | senserat, elatus specula quae prodidit ignis: |
280 | invenit inpulsos presso iam pulvere muros, |
281 | frigidaque, ut veteris, deprendit signa ruinae. |
282 | accendit pax ipsa loci, movitque furorem |
283 | Pompeiana quies et victo Caesare somnus. |
284 | ire vel in clades properat dum gaudia turbet. |
285 | Torquato ruit inde minax, qui Caesaris arma |
286 | segnius haud vidit, quam malo nauta tremente |
287 | omnia subducit Circaeae vela procellae; |
288 | agminaque interius muro breviore recepit, |
289 | densius ut parva disponeret arma corona. |
290 | transierat primi Caesar munimina valli, |
291 | cum super e totis immisit collibus arma |
292 | effuditque acies obsaeptum Magnus in hostem. |
293 | non sic Hennaeis habitans in vallibus horret |
294 | Enceladum spirante Noto, cum tota cavernas |
295 | egerit et torrens in campos defluit Aetna, |
296 | Caesaris ut miles glomerato pulvere victus |
297 | ante aciem caeci trepidus sub nube timoris |
298 | hostibus occurrit fugiens inque ipsa pavendo |
299 | fata ruit. totus mitti civilibus armis |
300 | usque vel in pacem potuit cruor: ipse furentis |
301 | dux tenuit gladios. felix ac libera regum, |
302 | Roma, fores iurisque tui, vicisset in illo |
303 | si tibi Sulla loco. dolet, heu, semperque dolebit |
304 | quod scelerum, Caesar, prodest tibi summa tuorum, |
305 | cum genero pugnasse pio. pro tristia fata! |
306 | non Uticae Libye clades, Hispania Mundae |
307 | flesset et infando pollutus sanguine Nilus |
308 | nobilius Phario gestasset rege cadaver, |
309 | nec Iuba Marmaricas nudus pressisset harenas |
310 | Poenorumque umbras placasset sanguine fuso |
311 | Scipio, nec sancto caruisset vita Catone. |
312 | ultimus esse dies potuit tibi Roma malorum, |
313 | exire e mediis potuit Pharsalia fatis. |
314 | deserit averso possessam numine sedem |
315 | Caesar et Emathias lacero petit agmine terras. |
316 | arma secuturum soceri, quacumque fugasset, |
317 | temptavere suo comites devertere Magnum |
318 | hortatu, patrias sedes atque hoste carentem |
319 | Ausoniam peteret. 'numquam me Caesaris' inquit |
320 | 'exemplo reddam patriae, numquamque videbit |
321 | me nisi dimisso redeuntem milite Roma. |
322 | Hesperiam potui motu surgente tenere, |
323 | si vellem patriis aciem committere templis |
324 | ac medio pugnare foro. dum bella relegem, |
325 | extremum Scythici transcendam frigoris orbem |
326 | ardentisque plagas. victor tibi, Roma, quietem |
327 | eripiam, qui, ne premerent te proelia, fugi? |
328 | a potius, nequid bello patiaris in isto, |
329 | te Caesar putet esse suam. ' sic fatus in ortus |
330 | Phoebeos condixit iter, terraeque secutus |
331 | devia, qua vastos aperit Candavia saltus, |
332 | contigit Emathiam, bello quam fata parabant. |
333 | Thessaliam, qua parte diem brumalibus horis |
334 | attollit Titan, rupes Ossaea coercet; |
335 | cum per summa poli Phoebum trahit altior aestas, |
336 | Pelion opponit radiis nascentibus umbras; |
337 | at medios ignes caeli rapidique Leonis |
338 | solstitiale caput nemorosus summovet Othrys. |
339 | excipit adversos Zephyros et Iapyga Pindus |
340 | et maturato praecidit vespere lucem; |
341 | nec metuens imi Borean habitator Olympi |
342 | lucentem totis ignorat noctibus Arcton. |
343 | hos inter montis media qui valle premuntur, |
344 | perpetuis quondam latuere paludibus agri, |
345 | flumina dum campi retinent nec pervia Tempe |
346 | dant aditus pelagi, stagnumque inplentibus unum |
347 | crescere cursus erat. postquam discessit Olympo |
348 | Herculea gravis Ossa manu subitaeque ruinam |
349 | sensit aquae Nereus, melius mansura sub undis |
350 | Emathis aequorei regnum Pharsalos Achillis |
351 | eminet et, prima Rhoeteia litora pinu |
352 | quae tetigit, Phylace Pteleosque et Dorion ira |
353 | flebile Pieridum; Trachin pretioque nefandae |
354 | lampados Herculeis fortis Meliboea pharetris |
355 | atque olim Larisa potens; ubi nobile quondam |
356 | nunc super Argos arant, veteres ubi fabula Thebas |
357 | monstrat Echionias, ubi quondam Pentheos exul |
358 | colla caputque ferens supremo tradidit igni |
359 | questa quod hoc solum nato rapuisset Agaue. |
360 | ergo abrupta palus multos discessit in amnes. |
361 | purus in occasus, parvi sed gurgitis, Aeas |
362 | Ionio fluit inde mari, nec fortior undis |
363 | labitur avectae pater Isidis, et tuus, Oeneu, |
364 | paene gener crassis oblimat Echinadas undis, |
365 | et Meleagream maculatus sanguine Nessi |
366 | Euhenos Calydona secat. ferit amne citato |
367 | Maliacas Spercheos aquas, et flumine puro |
368 | inrigat Amphrysos famulantis pascua Phoebi. |
369 | accipit Asopos cursus Phoenixque Melasque |
370 | quique nec umentis nebulas nec rore madentem |
371 | aera nec tenues ventos suspirat Anauros, |
372 | et quisquis pelago per se non cognitus amnis |
373 | Peneo donavit aquas: it gurgite rapto |
374 | Apidanos numquamque celer nisi mixtus Enipeus; |
375 | solus, in alterius nomen cum venerit undae, |
376 | defendit Titaresos aquas lapsusque superne |
377 | gurgite Penei pro siccis utitur arvis. |
378 | hunc fama est Stygiis manare paludibus amnem |
379 | et capitis memorem fluvii contagia vilis |
380 | nolle pati superumque sibi servare timorem. |
381 | ut primum emissis patuerunt amnibus arva, |
382 | pinguis Bebrycio discessit vomere sulcus; |
383 | mox Lelegum dextra pressum descendit aratrum, |
384 | Aeolidae Dolopesque solum fregere coloni |
385 | et Magnetes equis, Minyae gens cognita remis. |
386 | illic semiferos Ixionidas Centauros |
387 | feta Pelethroniis nubes effudit in antris: |
388 | aspera te Pholoes frangentem, Monyche, saxa, |
389 | teque sub Oetaeo torquentem vertice volsas, |
390 | Rhoece ferox, quas vix Boreas inverteret ornos, |
391 | hospes et Alcidae magni Phole, teque, per amnem |
392 | inprobe Lernaeas vector passure sagittas, |
393 | teque, senex Chiron, gelido qui sidere fulgens |
394 | inpetis Haemonio maiorem Scorpion arcu. |
395 | hac tellure feri micuerunt semina Martis. |
396 | primus ab aequorea percussis cuspide saxis |
397 | Thessalicus sonipes, bellis feralibus omen, |
398 | exiluit, primus chalybem frenosque momordit |
399 | spumavitque novis Lapithae domitoris habenis. |
400 | prima fretum scindens Pagasaeo litore pinus |
401 | terrenum ignotas hominem proiecit in undas. |
402 | primus Thessalicae rector telluris Ionos |
403 | in formam calidae percussit pondera massae |
404 | fudit et argentum flammis aurumque moneta |
405 | fregit et inmensis coxit fornacibus aera. |
406 | illic, quod populos scelerata inpegit in arma, |
407 | divitias numerare datum est. hinc maxima serpens |
408 | descendit Python Cirrhaeaque fluxit in arva, |
409 | unde et Thessalicae veniunt ad Pythia laurus. |
410 | inpius hinc prolem superis inmisit Aloeus, |
411 | inseruit celsis prope se cum Pelion astris |
412 | sideribusque vias incurrens abstulit Ossa. |
413 | hac ubi damnata fatis tellure locarunt |
414 | castra duces, cunctos belli praesaga futuri |
415 | mens agitat, summique gravem discriminis horam |
416 | adventare palam est, propius iam fata moveri. |
417 | degeneres trepidant animi peioraque versant; |
418 | ad dubios pauci praesumpto robore casus |
419 | spemque metumque ferunt. turbae sed mixtus inerti |
420 | Sextus erat, Magno proles indigna parente, |
421 | cui mox Scyllaeis exul grassatus in undis |
422 | polluit aequoreos Siculus pirata triumphos. |
423 | qui stimulante metu fati praenoscere cursus, |
424 | inpatiensque morae venturisque omnibus aeger, |
425 | non tripodas Deli, non Pythia consulit antra, |
426 | nec quaesisse libet primis quid frugibus altrix |
427 | aere Iovis Dodona sonet, quis noscere fibra |
428 | fata queat, quis prodat aves, quis fulgura caeli |
429 | servet et Assyria scrutetur sidera cura, |
430 | aut siquid tacitum sed fas erat. ille supernis |
431 | detestanda deis saevorum arcana magorum |
432 | noverat et tristis sacris feralibus aras, |
433 | umbrarum Ditisque fidem, miseroque liquebat |
434 | scire parum superos. vanum saevumque furorem |
435 | adiuvat ipse locus vicinaque moenia castris |
436 | Haemonidum, ficti quas nulla licentia monstri |
437 | transierit, quarum quidquid non creditur ars est. |
438 | Thessala quin etiam tellus herbasque nocentes |
439 | rupibus ingenuit sensuraque saxa canentes |
440 | arcanum ferale magos. ibi plurima surgunt |
441 | vim factura deis, et terris hospita Colchis |
442 | legit in Haemoniis quas non advexerat herbas. |
443 | inpia tot populis, tot surdas gentibus aures |
444 | caelicolum dirae convertunt carmina gentis. |
445 | una per aetherios exit vox illa recessus |
446 | verbaque ad invitum perfert cogentia numen, |
447 | quod non cura poli caelique volubilis umquam |
448 | avocat. infandum tetigit cum sidera murmur, |
449 | tum, Babylon Persea licet secretaque Memphis |
450 | omne vetustorum solvat penetrale magorum, |
451 | abducet superos alienis Thessalis aris. |
452 | carmine Thessalidum dura in praecordia fluxit |
453 | non fatis adductus amor, flammisque severi |
454 | inlicitis arsere senes. nec noxia tantum |
455 | pocula proficiunt aut cum turgentia suco |
456 | frontis amaturae subducunt pignora fetae: |
457 | mens hausti nulla sanie polluta veneni |
458 | excantata perit. quos non concordia mixti |
459 | alligat ulla tori blandaeque potentia formae |
460 | traxerunt torti magica vertigine fili. |
461 | cessavere vices rerum, dilataque longa |
462 | haesit nocte dies. legi non paruit aether, |
463 | torpuit et praeceps audito carmine mundus, |
464 | axibus et rapidis inpulsos Iuppiter urguens |
465 | miratur non ire polos. nunc omnia conplent |
466 | imbribus et calido praeducunt nubila Phoebo, |
467 | et tonat ignaro caelum Iove: vocibus isdem |
468 | umentis late nebulas nimbosque solutis |
469 | excussere comis. ventis cessantibus aequor |
470 | intumuit, rursus vetitum sentire procellas |
471 | conticuit turbante Noto; puppemque ferentes |
472 | in ventum tumuere sinus. de rupe pependit |
473 | abscisa fixus torrens, amnisque cucurrit |
474 | non qua pronus erat. Nilum non extulit aestas, |
475 | Maeander derexit aquas, Rhodanumque morantem |
476 | praecipitavit Arar. summisso vertice montes |
477 | explicuere iugum, nubes suspexit Olympus, |
478 | solibus et nullis Scythicae, cum bruma rigeret, |
479 | dimaduere nives. inpulsam sidere Tethyn |
480 | reppulit Haemonium defenso litore carmen. |
481 | terra quoque inmoti concussit ponderis axes, |
482 | et medium vergens titubavit nisus in orbem. |
483 | tantae molis onus percussum voce recessit |
484 | perspectumque dedit circum labentis Olympi. |
485 | omne potens animal leti genitumque nocere |
486 | et pavet Haemonias et mortibus instruit artes. |
487 | has avidae tigres et nobilis ira leonum |
488 | ore fovent blando; gelidos his explicat orbes |
489 | inque pruinoso coluber distenditur arvo; |
490 | viperei coeunt abrupto corpore nodi, |
491 | humanoque cadit serpens adflata veneno. |
492 | quis labor hic superis cantus herbasque sequendi |
493 | spernendique timor? cuius commercia pacti |
494 | obstrictos habuere deos? parere necesse est, |
495 | an iuvat? ignota tantum pietate merentur, |
496 | an tacitis valuere minis? hoc iuris in omnis |
497 | est illis superos, an habent haec carmina certum |
498 | imperiosa deum, qui mundum cogere quidquid |
499 | cogitur ipse potest? illis et sidera primum |
500 | praecipiti deducta polo, Phoebeque serena |
501 | non aliter diris verborum obsessa venenis |
502 | palluit et nigris terrenisque ignibus arsit, |
503 | quam si fraterna prohiberet imagine tellus |
504 | insereretque suas flammis caelestibus umbras; |
505 | et patitur tantos cantu depressa labores |
506 | donec suppositas propior despumet in herbas. |
507 | hos scelerum ritus, haec dirae crimina gentis |
508 | effera damnarat nimiae pietatis Erictho |
509 | inque novos ritus pollutam duxerat artem. |
510 | illi namque nefas urbis summittere tecto |
511 | aut laribus ferale caput, desertaque busta |
512 | incolit et tumulos expulsis obtinet umbris |
513 | grata deis Erebi. coetus audire silentum, |
514 | nosse domos Stygias arcanaque Ditis operti |
515 | non superi, non vita vetat. tenet ora profanae |
516 | foeda situ macies, caeloque ignota sereno |
517 | terribilis Stygio facies pallore gravatur |
518 | inpexis onerata comis: si nimbus et atrae |
519 | sidera subducunt nubes, tunc Thessala nudis |
520 | egreditur bustis nocturnaque fulmina captat. |
521 | semina fecundae segetis calcata perussit |
522 | et non letiferas spirando perdidit auras. |
523 | nec superos orat nec cantu supplice numen |
524 | auxiliare vocat nec fibras illa litantis |
525 | novit: funereas aris inponere flammas |
526 | gaudet et accenso rapuit quae tura sepulchro. |
527 | omne nefas superi prima iam voce precantis |
528 | concedunt carmenque timent audire secundum. |
529 | viventis animas et adhuc sua membra regentis |
530 | infodit busto, fatis debentibus annos |
531 | mors invita subit; perversa funera pompa |
532 | rettulit a tumulis, fugere cadavera letum. |
533 | fumantis iuvenum cineres ardentiaque ossa |
534 | e mediis rapit illa rogis ipsamque parentes |
535 | quam tenuere facem, nigroque volantia fumo |
536 | feralis fragmenta tori vestesque fluentis |
537 | colligit in cineres et olentis membra favillas. |
538 | ast, ubi servantur saxis, quibus intimus umor |
539 | ducitur, et tracta durescunt tabe medullae |
540 | corpora, tunc omnis avide desaevit in artus |
541 | inmergitque manus oculis gaudetque gelatos |
542 | effodisse orbes et siccae pallida rodit |
543 | excrementa manus. laqueum nodosque nocentis |
544 | ore suo rupit, pendentia corpora carpsit |
545 | abrasitque cruces percussaque viscera nimbis |
546 | volsit et incoctas admisso sole medullas. |
547 | insertum manibus chalybem nigramque per artus |
548 | stintis tabi saniem virusque coactum |
549 | sustulit et nervo morsus retinente pependit. |
550 | et, quodcumque iacet nuda tellure cadaver, |
551 | ante feras volucresque sedet; nec carpere membra |
552 | vult ferro manibusque suis, morsusque luporum |
553 | expectat siccis raptura e faucibus artus. |
554 | nec cessant a caede manus, si sanguine vivo |
555 | est opus, erumpat iugulo qui primus aperto, |
556 | (nec refugit caedes, vivum si sacra cruorem) |
557 | extaque funereae poscunt trepidantia mensae. |
558 | vulnere sic ventris, non qua natura vocabat, |
559 | extrahitur partus calidis ponendus in aris; |
560 | et quotiens saevis opus est ac fortibus umbris |
561 | ipsa facit manes. hominum mors omnis in usu est. |
562 | illa genae florem primaevo corpore volsit, |
563 | illa comam laeva morienti abscidit ephebo. |
564 | saepe etiam caris cognato in funere dira |
565 | Thessalis incubuit membris atque oscula figens |
566 | truncavitque caput conpressaque dentibus ora |
567 | laxavit siccoque haerentem gutture linguam |
568 | praemordens gelidis infudit murmura labris |
569 | arcanumque nefas Stygias mandavit ad umbras. |
570 | hanc ut fama loci Pompeio prodidit, alta |
571 | nocte poli, Titan medium quo tempore ducit |
572 | sub nostra tellure diem, deserta per arva |
573 | carpit iter. fidi scelerum suetique ministri |
574 | effractos circum tumulos ac busta vagati |
575 | conspexere procul praerupta in caute sedentem, |
576 | qua iuga devexus Pharsalica porrigit Haemus. |
577 | illa magis magicisque deis incognita verba |
578 | temptabat carmenque novos fingebat in usus. |
579 | namque timens, ne Mars alium vagus iret in orbem |
580 | Emathis et tellus tam multa caede careret, |
581 | pollutos cantu dirisque venefica sucis |
582 | conspersos vetuit transmittere bella Philippos, |
583 | tot mortes habitura suas usuraque mundi |
584 | sanguine: caesorum truncare cadavera regum |
585 | sperat et Hesperiae cineres avertere gentis |
586 | ossaque nobilium tantosque adquirere manes. |
587 | hic ardor solusque labor, quid corpore Magni |
588 | proiecto rapiat, quos Caesaris involet artus. |
589 | quam prior adfatur Pompei ignava propago. |
590 | 'O decus Haemonidum, populis quae pandere fata |
591 | quaeque suo ventura potes devertere cursu, |
592 | te precor ut certum liceat mihi noscere finem |
593 | quem belli fortuna paret. non ultima turbae |
594 | pars ego Romanae, Magni clarissima proles, |
595 | vel dominus rerum vel tanti funeris heres. |
596 | mens dubiis perculsa pavet rursusque parata est |
597 | certos ferre metus: hoc casibus eripe iuris, |
598 | ne subiti caecique ruant. vel numina torque |
599 | vel tu parce deis et manibus exprime verum. |
600 | Elysias resera sedes ipsamque vocatam, |
601 | quos petat e nobis, Mortem mihi coge fateri. |
602 | non humilis labor est: dignum, quod quaerere cures |
603 | vel tibi, quo tanti praeponderet alea fati.' |
604 | inpia laetatur vulgato nomine famae |
605 | Thessalis, et contra 'si fata minora moveres, |
606 | pronum erat, o iuvenis, quos velles' inquit 'in actus |
607 | invitos praebere deos. conceditur arti, |
608 | unam cum radiis presserunt sidera mortem, |
609 | inseruisse moras; et, quamvis fecerit omnis |
610 | stella senem, medios herbis abrumpimus annos. |
611 | at, simul a prima descendit origine mundi |
612 | causarum series, atque omnia fata laborant |
613 | si quicquam mutare velis, unoque sub ictu |
614 | stat genus humanum, tum, Thessala turba fatemur, |
615 | plus Fortuna potest. sed, si praenoscere casus |
616 | contentus, facilesque aditus multique patebunt |
617 | ad verum: tellus nobis aetherque chaosque |
618 | aequoraque et campi Rhodopaeaque saxa loquentur. |
619 | sed pronum, cum tanta novae sit copia mortis, |
620 | Emathiis unum campis attollere corpus, |
621 | ut modo defuncti tepidique cadaveris ora |
622 | plena voce sonent, nec membris sole perustis |
623 | auribus incertum feralis strideat umbra.' |
624 | dixerat, et noctis geminatis arte tenebris |
625 | maestum tecta caput squalenti nube pererrat |
626 | corpora caesorum tumulis proiecta negatis. |
627 | continuo fugere lupi, fugere revolsis |
628 | unguibus inpastae volucres, dum Thessala vatem |
629 | eligit et gelidas leto scrutata medullas |
630 | pulmonis rigidi stantis sine vulnere fibras |
631 | invenit et vocem defuncto in corpore quaerit. |
632 | fata peremptorum pendent iam multa virorum, |
633 | quem superis revocasse velit. si tollere totas |
634 | temptasset campis acies et reddere bello, |
635 | cessissent leges Erebi, monstroque potenti |
636 | extractus Stygio populus pugnasset Averno. |
637 | electum tandem traiecto gutture corpus |
638 | ducit, et inserto laqueis feralibus unco |
639 | per scopulos miserum trahitur per saxa cadaver |
640 | victurum, montisque cavi, quem tristis Erictho |
641 | damnarat sacris, alta sub rupe locatur. |
642 | haud procul a Ditis caecis depressa cavernis |
643 | in praeceps subsedit humus, quam pallida pronis |
644 | urguet silva comis et nullo vertice caelum |
645 | suspiciens Phoebo non pervia taxus opacat. |
646 | marcentes intus tenebrae pallensque sub antris |
647 | longa nocte situs numquam nisi carmine factum |
648 | lumen habet. non Taenariis sic faucibus aer |
649 | sedit iners, maestum mundi confine latentis |
650 | ac nostri, quo non metuant admittere manes |
651 | Tartarei reges. nam, quamvis Thessala vates |
652 | vim faciat fatis, dubium est, quod traxerit illuc |
653 | aspiciat Stygias an quod descenderit umbras. |
654 | discolor et vario furialis cultus amictu |
655 | induitur, vultusque aperitur crine remoto, |
656 | et coma vipereis substringitur horrida sertis. |
657 | ut pavidos iuvenis comites ipsumque trementem |
658 | conspicit exanimi defixum lumina vultu, |
659 | 'ponite' ait 'trepida conceptos mente timores: |
660 | iam nova, iam vera reddetur vita figura, |
661 | ut quamvis pavidi possint audire loquentem. |
662 | si vero Stygiosque lacus ripamque sonantem |
663 | ignibus ostendam, si me praebente videri |
664 | Eumenides possint villosaque colla colubris |
665 | Cerberus excutiens et vincti terga gigantes, |
666 | quis timor, ignavi, metuentis cernere manes?' |
667 | pectora tum primum ferventi sanguine supplet |
668 | vulneribus laxata novis taboque medullas |
669 | abluit et virus large lunare ministrat. |
670 | huc quidquid fetu genuit natura sinistro |
671 | miscetur: non spuma canum quibus unda timori est, |
672 | viscera non lyncis, non durae nodus hyaenae |
673 | defuit et cervi pastae serpente medullae, |
674 | non puppem retinens Euro tendente rudentis |
675 | in mediis echenais aquis oculique draconum |
676 | quaeque sonant feta tepefacta sub alite saxa, |
677 | non Arabum volucer serpens innataque rubris |
678 | aequoribus custos pretiosae vipera conchae |
679 | aut viventis adhuc Libyci membrana cerastae |
680 | aut cinis Eoa positi phoenicis in ara. |
681 | quo postquam viles et habentis nomina pestis |
682 | contulit, infando saturatas carmine frondis |
683 | et, quibus os dirum nascentibus inspuit, herbas |
684 | addidit et quidquid mundo dedit ipsa veneni. |
685 | tum vox Lethaeos cunctis pollentior herbis |
686 | excantare deos confundit murmura primum |
687 | dissona et humanae multum discordia linguae. |
688 | latratus habet illa canum gemitusque luporum, |
689 | quod trepidus bubo, quod strix nocturna queruntur, |
690 | quod strident ululantque ferae, quod sibilat anguis; |
691 | exprimit et planctus inlisae cautibus undae |
692 | silvarumque sonum fractaeque tonitrua nubis: |
693 | tot rerum vox una fuit. mox cetera cantu |
694 | explicat Haemonio penetratque in Tartara lingua. |
695 | 'Eumenides Stygiumque nefas Poenaeque nocentum |
696 | et Chaos innumeros avidum confundere mundos |
697 | et rector terrae, quem longa in saecula torquet |
698 | mors dilata deum; Styx et quos nulla meretur |
699 | Thessalis Elysios; caelum matremque perosa |
700 | Persephone, nostraeque Hecates pars ultima, per quam |
701 | manibus et mihi sunt tacitae commercia linguae, |
702 | ianitor et sedis laxae, qui viscera saevo |
703 | spargis nostra cani, repetitaque fila sorores |
704 | tracturae, tuque o flagrantis portitor undae, |
705 | iam lassate senex ad me redeuntibus umbris, |
706 | exaudite preces. si vos satis ore nefando |
707 | pollutoque voco, si numquam haec carmina fibris |
708 | humanis ieiuna cano, si pectora plena |
709 | saepe deo lavi calido prosecta cerebro, |
710 | si quisquis vestris caput extaque lancibus infans |
711 | inposuit victurus erat, parete precanti. |
712 | non in Tartareo latitantem poscimus antro |
713 | adsuetamque diu tenebris, modo luce fugata |
714 | descendentem animam; primo pallentis hiatu |
715 | haeret adhuc Orci, licet has exaudiat herbas, |
716 | ad manes ventura semel. ducis omnia nato |
717 | Pompeiana canat nostri modo militis umbra, |
718 | si bene de vobis civilia bella merentur.' |
719 | haec ubi fata caput spumantiaque ora levavit, |
720 | aspicit astantem proiecti corporis umbram, |
721 | exanimis artus invisaque claustra timentem |
722 | carceris antiqui. pavet ire in pectus apertum |
723 | visceraque et ruptas letali vulnere fibras. |
724 | a miser, extremum cui mortis munus inique |
725 | eripitur, non posse mori. miratur Erictho |
726 | has fatis licuisse moras, irataque morti |
727 | verberat inmotum vivo serpente cadaver, |
728 | perque cavas terrae, quas egit carmine, rimas |
729 | manibus inlatrat regnique silentia rumpit. |
730 | 'Tisiphone vocisque meae secura Megaera, |
731 | non agitis saevis Erebi per inane flagellis |
732 | infelicem animam? iam vos ego nomine vero |
733 | eliciam Stygiasque canes in luce superna |
734 | destituam; per busta sequar per funera custos, |
735 | expellam tumulis, abigam vos omnibus urnis. |
736 | teque deis, ad quos alio procedere vultu |
737 | ficta soles, Hecate pallenti tabida forma, |
738 | ostendam faciemque Erebi mutare vetabo. |
739 | eloquar inmenso terrae sub pondere quae te |
740 | contineant, Hennaea, dapes, quo foedere maestum |
741 | regem noctis ames, quae te contagia passam |
742 | noluerit revocare Ceres. tibi, pessime mundi |
743 | arbiter, inmittam ruptis Titana cavernis, |
744 | et subito feriere die. paretis, an ille |
745 | conpellandus erit, quo numquam terra vocato |
746 | non concussa tremit, qui Gorgona cernit apertam |
747 | verberibusque suis trepidam castigat Erinyn, |
748 | indespecta tenet vobis qui Tartara, cuius |
749 | vos estis superi, Stygias qui perierat undas?' |
750 | protinus astrictus caluit cruor atraque fovit |
751 | vulnera et in venas extremaque membra cucurrit. |
752 | percussae gelido trepidant sub pectore fibrae, |
753 | et nova desuetis subrepens vita medullis |
754 | miscetur morti. tunc omnis palpitat artus, |
755 | tenduntur nervi; nec se tellure cadaver |
756 | paulatim per membra levat, terraque repulsum est |
757 | erectumque semel. distento lumina rictu |
758 | nudantur. nondum facies viventis in illo, |
759 | iam morientis erat: remanet pallorque rigorque, |
760 | et stupet inlatus mundo. set murmure nullo |
761 | ora astricta sonant: vox illi linguaque tantum |
762 | responsura datur. 'dic' inquit Thessala 'magna, |
763 | quod iubeo, mercede mihi; nam vera locutum |
764 | inmunem toto mundi praestabimus aevo |
765 | artibus Haemoniis: tali tua membra sepulchro, |
766 | talibus exuram Stygio cum carmine silvis, |
767 | ut nullos cantata magos exaudiat umbra. |
768 | sit tanti vixisse iterum: nec verba nec herbae |
769 | audebunt longae somnum tibi solvere Lethes |
770 | a me morte data. tripodas vatesque deorum |
771 | sors obscura decet: certus discedat, ab umbris |
772 | quisquis vera petit duraeque oracula mortis |
773 | fortis adit. ne parce, precor: da nomina rebus, |
774 | da loca; da vocem qua mecum fata loquantur.' |
775 | addidit et carmen, quo, quidquid consulit, umbram |
776 | scire dedit. maestum fletu manante cadaver |
777 | 'tristia non equidem Parcarum stamina' dixit |
778 | 'aspexi tacitae revocatus ab aggere ripae; |
779 | quod tamen e cunctis mihi noscere contigit umbris |
780 | effera Romanos agitat discordia manes |
781 | inpiaque infernam ruperunt arma quietem; |
782 | Elysias Latii sedes ac Tartara maesta |
783 | diversi liquere duces. quid fata pararent |
784 | hi fecere palam. tristis felicibus umbris |
785 | vultus erat: vidi Decios natumque patremque, |
786 | lustrales bellis animas, flentemque Camillum |
787 | et Curios, Sullam de te, Fortuna, querentem; |
788 | deplorat Libycis perituram Scipio terris |
789 | infaustam subolem; maior Carthaginis hostis |
790 | non servituri maeret Cato fata nepotis: |
791 | solum te, consul depulsis prime tyrannis |
792 | Brute, pias inter gaudentem vidimus umbras. |
793 | abruptis Catilina minax fractisque catenis |
794 | exultat Mariique truces nudique Cethegi; |
795 | vidi ego laetantis, popularia nomina, Drusos |
796 | legibus inmodicos ausosque ingentia Gracchos; |
797 | aeternis chalybis nodis et carcere Ditis |
798 | constrictae plausere manus, camposque piorum |
799 | poscit turba nocens. regni possessor inertis |
800 | pallentis aperit sedes, abruptaque saxa |
801 | asperat et durum vinclis adamanta, paratque |
802 | poenam victori. refer haec solacia tecum, |
803 | o iuvenis, placido manes patremque domumque |
804 | expectare sinu regnique in parte serena |
805 | Pompeis servare locum. nec gloria parvae |
806 | sollicitet vitae: veniet quae misceat omnis |
807 | hora duces. properate mori, magnoque superbi |
808 | quamvis e parvis animo descendite bustis |
809 | et Romanorum manes calcate deorum. |
810 | quem tumulum Nili, quem Thybridis adluat unda |
811 | quaeritur, et ducibus tantum de funere pugna est. |
812 | tu fatum ne quaere tuum: cognoscere Parcae |
813 | me reticente dabunt; tibi certior omnia vates |
814 | ipse canet Siculis genitor Pompeius in arvis, |
815 | ille quoque incertus quo te vocet, unde repellat, |
816 | quas iubeat vitare plagas, quae sidera mundi. |
817 | Europam, miseri, Libyamque Asiamque timete: |
818 | distribuit tumulos vestris fortuna triumphis. |
819 | o miseranda domus, toto nil orbe videbis |
820 | tutius Emathia. ' sic postquam fata peregit, |
821 | stat vultu maestus tacito mortemque reposcit. |
822 | carminibus magicis opus est herbisque, cadaver |
823 | ut cadat, et nequeunt animam sibi reddere fata |
824 | consumpto iam iure semel. tunc robore multo |
825 | extruit illa rogum; venit defunctus ad ignes. |
826 | accensa iuvenem positum strue liquit Erictho |
827 | tandem passa mori, Sextoque ad castra parentis |
828 | it comes; et caelo lucis ducente colorem, |
829 | dum ferrent tutos intra tentoria gressus, |
830 | iussa tenere diem densas nox praestitit umbras. |